ROXAS CITY, CAPIZ- Nagapabilin nga yara sa Red Alert status ang Capiz Provincial Disaster Risk Reduction and Management Council kadungan sang malapnagon nga pagbaha kag mamunog nga pag-ulan tuga sang Bagyo Ramil sa probinsya.
Sa interview sang Bombo Radyo kay Atty. Sheila Artillero, Head sang Capiz Provincial Disaster Risk Reduction and Management Council, iya ginpahayag nga padayon nga nagamonitor ang ila nga team sa sitwasyon sang mga pumuluyo sang probinsya.
Suno kay Artillero, ginatsekyar sang ila nga team ang mga damages nga naangkon sang pila ka mga sektor, imprastruktura, kag mga puluy-an sa probinsya.
Pahayag pa nya, sa subong, nagahulat pa man ang ila nga talatapan sang tagsa ka mga consolidated report nagikan sa tagsa ka mga Municipal Disaster Risk Reduction and Management Office, agud nga makita na ang kahalitan nga ginbilin sang Bagyo Ramil sa probinsya.
Nagpahanumdom naman ang natungdan sa tagsa ka mga pumuluyo, nga magpabilin nga aligmat kag alerto ilabi na sa tion sang mga kalamidad.
Interviewed by Bombo Jessa Mae Siman De Los Santos
