Ka-Bombo, isa ka man bala sa mga may luyag nga magpa-dental veneers?
Aba! Mangin maid-id gid sa pagpangita sang lehitimo nga dentista!
Bangud didto sa Florida, USA, isa ka nagpakuno-kuno nga dentista ang natukiban nga nagagamit sang super glue sa dental procedure. Oh no!
Suno sa report, isa ka 35-anyos nga babae sa Florida, USA ang gindakop sang mga otoridad matapos gin-akusaran nga peke nga dentist bangud sa pagpatigayon sang mga dental procedure nga wala sang lisensiya, lakip na ang pagpangtakod sang dental veneers gamit ang super glue.
Ginkilala ang babaye nga si Emely Martinez, nga nagpakilala bilang isa ka “smile makeover expert” sa social media sa diin nagapang-engganyo ini sang mga kliyente pinaagi sang pagtanyag sang pinakabarato nga full-mouth veneer treatment nga nagabalor sang $2,500 ukon masobra P140,000.
Apang, nabisto ang iya nga modus matapos magreklamo ang duha sa iya nga mga kliyente nga nag-angkon sang dako nga halit sa ngipon, impeksiyon, kag toothache. Natukiban nila gikan sa mga lehitimo nga dentista nga ang ila mga veneers ang gintakod lamang gamit ang glue.
Sa subong, si Martinez ang nagapangatubang sang mga kaso nga fraud kag ‘practicing dentistry without an active license.’
