ROXAS CITY – Ginpanindugan sang Provincial Director sang Provincial Environment and Natural Resources Office (PENRO) nga wala sang kamatuoran ang ginareklamo sang isa ka residente natuhoy sa pagpahamtang sang perimeter fence ukon kudal sang ila nga opisina sa Barangay Lanot, Roxas City.
Ini ang ginpahayag ni Ruel Delos Reyes sang ma-interview sang Bombo Radyo Roxas.
Suno kay Delos Reyes nga wala nila ginapabay-an ang road right of way sang mga residente nga naga-istar sa likod nga bahin sang ila nga opisina bangud naghatag sila sang duha ka metros nga kalaparon sang dalan agud ma-agyan sang mga residente.
Magluwas diri, sila pa ang magadevelop sang lugar nga mahimo ma agyan sang mga residente.
Samtang ginklaro naman ni Reyes nga ang lugar nga ila ginapahamtangan sang ila nga opisina ang duta nga ginapanag-iyahan sang national government gani nagakadapat lamang nga pahamtangan sang perimeter fence agud indi man magkaladula ang mga gamit nga ginapanag-iyahan sang ila nga opisina.
Mahibaluan nga antes ginpahamtang ang pader nagpakighinun-anon pa ang mga katapo sang PENRO sa mga residente kag may yara sila sang nangin kasugtanan.
