Roxas City – Yara na sa napulo ka mga peryahan nga iligal naga-operate sa siyudad sang Roxas ang gin-demolished sang City Licensing Division kaupod ang mga katapu sang Roxas City PNP.
Suno kay City Licensing Office head Roselyn Estrebilla nga kinahanglan may yara sang nagakaigo nga mga requirements ang mga operator sang peryahan nga naga-operate sa siyudad.
Ginpahayag ni Estrebilla nga kinahanglan nga nakapaidalom ang peryahan sa fire safety inspection sang Bureau of Fire Protection (BFP), Barangay Clearance, resolution kag Mayor’s permit.
Wala man ginadumilian nga magkuha sang permit ang mga operator sang peryahan apang nagakadapat lamang nga sundon nila ang mga rekisitos nga ginapangayo sang city government.
Hugot man ang ila inspeksyon sa mga kabaranggayan sa siyudad sa diin may yara sang naga-operate nga peryahan.
Dugang pa sini nga luyag lamang sang alkalde sang siyudad nga mangin safe ang mga pumuluyo sa isa ka barangay nga may yara sang naga-operate nga peryahan bangud sa masami ginahalinan ini sang sugal.
Apang, nagpanugyan na lamang si Estrebilla nga sundon lamang ang pagsulundan agud mangin legal ang operasyon sang peryahan.
Samtang, nagapadayon ang ila inspeksyon sa mga lugar nga may yara sang operasyon nga peryahan.
