ROXAS CITY – Ginkalipay sang alkalde sang banwa sang President Roxas, Capiz ang pagbasura sang Commission on Elections sa petition for disqualification nga ginpasaka batuk sa iya sang liwat ini nga nagpapili sang nakaligad nga eleksiyon.
Suno kay Mayor Receliste ‘Tanoy’ Escolin, kasubong ginalauman na sini nga mabasura lamang ang ginpasaka nga petisyon batuk sa iya ni Mr. Ronilon Ballon, barangay tanod sang Barangay Cabug-cabug sang nasambit nga banwa bangud sang mga alegasyon nga wala sang kamatuoran.
Mahibaluan nga sandig sa ginpaguha nga desisyon sang Comelec – Second Division, ginbasura ang nasambit nga petisyon sadtong Mayo 21, sini nga tuig, kun sa diin natapos na ang pag-proklamar kay Escolin sadtong Mayo 14.
Mahibaluan nga nasaad sa Section 3, Rule 25 sang Comelec Resolution No. 9523 nga kinahanglan ma-file ang anuman nga petition for disqualification antes maproklamar ang isa ka kandidato.
Matandaan nga nag-ugat ang pestiyon nga ginpasaka ni Ballon batuk sa alkalde kasunod sang ginaalegar pagpang-harass sang utod ni Escolin nga si punong barangay Renboy Escolin kag iban pa nga mga kalalakinhan nga ginapahayag mga security agents sang alkalde.
