ROXAS CITY – Ginakalipay nga gin-anunsyo sang tagpamaba sang Philippine Health Insurance Corporation (PhilHealth) – Capiz nga iga-implementar na ang 30% increase sa pila ka mga benefits coverage sumugod subong nga adlaw, Pebrero 14, 2024 kadungan sa ika-29 nga anibersaryo sang PhilHealth.
Sa interview sang Bombo Radyo kay Ms. Mary Jane Amigo, suno diri tinutuyo sang amu nga adjustment nga mapahagan-hagan ang problema pinansyal sang mga pasyente dala sang mataas nga inflation.
May pipila naman ka mga benefits package ang nagtaas sa 150% ilabi na ‘most burdensome diseases’ kag ‘commonly availed cases’ kasubong sang acute stroke kag high risk pneumonia.
Sa karon ang mga pasyente nga nagasupreher sang ischemic stroke ang mahimo maka-avail sang P76,000 halin sa P28,000 kag hemorrhagic conditions sang P80,000 benefits halin sa 38,000.
Samtang, nagalab-ot naman sa P90,100 ang mahimo ma-avail sang mga pasyente nga may high risk pneumonia, nga anay yara lamang sa P32,000.
Matandaan sang nanligad nga tuig, gin-aprubahan man sang PhilHealth ang 156 sessions of dialysis sang mga pasyente nga may Chronic Kidney Diseases (CKD) sa sulod sang isa katuig.
Magluwas pa diri, ang pinakabag-o ang benefit package sang PhilHealth amu ang Mental Health Package para sa mga may mental illness kasubong sang depression.
Yara sa P9,000 ang mahimo ma-avail sa idalum sang General Mental Health Services samtang P16,000 naman para sa Specialty Mental Health sa diin sakup sa amu nga benepisyo ang pagpakonsulta sa doctor, serbisyo kag bulong.
