Liwat nga nagpahanumdum si Senate Committee on Health Chairman Senator Bong Go sa PhilHealth, sa liwat nga pag-atubang sang ahensya sa komitiba.
Suno kay Go, kung magpangayo ang komite sang update may kaangtanan sa mga promisa sang Philhealth nga pakaayuhun ang mga benepisyo kag serbisyo para sa mga pasyente nga Pilipino kinahanglan may detalyado nga sabat.
Matandaan nga ginpromisa sang PhilHealth kay Senator Bong Go nga buhinan ang kontribusyon sang mga Philhealth members.
Apang makaligad ang pila ka bulan, ginsiling sang ahensya nga ila pa ini ginatun-an antes irekomendar kay Presidente Ferdinand Bongbong Marcos Jr.
Samtang, nag-paandam naman ang Senador sa PhilHealth nga indi mag “iwas pusoy” ukon magsabat sang paliwat-liwat.
Suno sa Senador, madamu sa gihapon nga mga Pilipino ang nagaproblema sa Philhealth imbes nga patulugon ang pondo mas maayo nga gamiton ini sa mga programa nga mapuslan ilabi na sa mga pasyente nga nabudlayan.
