Ginanunsiyo sang Philippine Health Insurance Corporation (PhilHealth) nga iga-reprocess na sini ang P1.1-M denied claims ukon ginabulubanta yara sa P8.8-B.
Suno sa ahensya tinutuyo sini nga tikang nga limpyuhon ang backlog nga dala sang mga ulihi nga pag-file sang mga ospital kag siguraduhon ang gilayon nga pagbayad para sa mga healthcare provider.
Ini nga man nga tikang agud mabuhinan ang mga problema sang ahensya kag siguraduhon nga mabaton sang mga healthcare provider ang intsakto nga bayad para sa ila mga serbisyo.
Sa isa ka pagsinapol sa Central Office sang ahensya sa Pasig, ginsiling ni PhilHealth President at CEO Dr. Edwin Mercado nga ang mga denied claims bangud sa mga problema nga ginapangatubang sang ahensya kag indi agud patalangon ang mga healthcare providers.
Ginpabugal man sang Philhealth chief nga ang reprocessing sang claims magaresulta sa pagpaayo sang access sa healthcare kag magapadasig sang mga bureaucratic procedures para sa mga ospital kag pasyente.
Matandaan nga sadtong 2018 tubtob 2024, ginsiling sang PhilHealth nga 30% sang tanan nga denied claims bangud sa ulihi nga pagsumite sang mga providers.
Kung sa diin ini ang nangin epekro sa mga denied claims, apang ginsiguro ni Mercado nga iga-reconsider sang ahensya ang mga claims agud masiguro nga mabaton sang mga healthcare provider ang instakto nga balayaran.
Sandig sa bag-o nga polisiya, ginhatagan ang mga ospital kag iban pa nga mga health facility sang anum ka bulan nagikan sa bisa sang Circular agud liwat nga isumite ang ila mga denied claims nga ginbalibaran anay sang Philhealth.
Ginhatagan man sang pagtamod sang PhilHealth nga ang mga claims nga ginpasa sa ila sadtong Enero 1, 2018, tubtob Disyembre 31, 2024, nga wala gin-apela ukon ginreklamo apang yara pa sa kamot sang mga healthcare provider kalakip na para sa reprocessing.
Kalakip man sa mga iga-reconsider ang mga claims nga yara sa pagpanag-iya sang PhilHealth Regional Office Benefit Administration Sections, mga claims nga yara sa idalum sang administrative protest sa PhilHealth Regional Office – Claims Review Committee, ukon mga gin-apela sa Protest and Appeals Review Department.
Samtang, ang iban naman nga mga nag-apela sang ila
denied claims nga ginsumite sa mga regular courts ang iga-reprocess man apang kinahanglan nga bawion sang mga ini ang ila petisyon batuk sa PhilHealth.
Bangud sini, ginpaandaman ni Dr. Mercado ang mga ospital may kaangtanan sa importansya sang temprano nga pagsumite sang mga claims agud masiguro ang gilayon nga pagbayad.
