HONG KONG, CHINA- Padayon nga nagapakig-angut ang Philippine Consolate General sa tagsa ka mga employer sang Overseas Filipino Workers agud kamustahon ang sitwasyon sang mga ini matapos ang nagluntad nga sunog sa Wang Fuk Court, Tai Po, Hong Kong, China.
Sa interview sang Bombo Radyo kay Hong Kong Correspondent Yolly Pantilla, iya ginpahayag nga wala pa sa gihapon sang kumpirmasyon kun may napatay nga Pinoy sa amo nga sunog.
Suno kay Pantilla, yara pa lang sa 50 ka mga OFWs ang ginapahayag nga napakig-angutan na sang Philippine Consolate kag ang iban indi pa makontak sa subong.
Pahayag niya, madamo sang mga Overseas Filipino Workers ang nagatrabaho sa amo nga residential building kag tuman man ang ila nga pagkabalaka sa mga ini.
Ginsiling man ni Pantilla nga sandig sa mga impormasyon nga ginaguha, ginabulubanta yara na sa masobra 200 ka mga indibidwal ang ginbawian sang kabuhi kag nagadugang man ang numero sang mga nagkaladula.
Dugang pa sang natungdan, sila nga mga Pinoy nga malayo sa amo nga building nga nasunig yara sa hilway nga sitwasyon, kag nagapangabay nga wala lang man sang mga Pilipino nga napatay.
Nagpanawagan naman si Yolly Pantilla sa iya nga mga kapamilyan diri sa Pilipinas, ilabi na sa Barangay Jaena Norte, Jamindan, Capiz, nga indi magkabalaka, bangud nga yara siya sa maayos nga kahimtangan.
Interviewed by Bombo Sunnie Mae Constantino Batencila
