Preparado na ang Philippine Team sa ila pagahimuon nga pag-martsa para sa opening ceremony sang Paris Olympics.
Ginpahayag ni Philippine Olympic Committee (POC) President Abraham “Bambol” Tolentino nga pagapangunahan nanday Pinoy boxer Nesthy Petecio kag Carlo Paalam ang paradae kaupod ang 16 ka iban nga mga atleta.
Samtang, indi makaupod si Tolentino sa parada bangud ginpili sini nga magpungko sa family section sa kilid sang River Seine.
Makaupod nanday Paalam kag Petecio ang kapareho nga boksingero nga sanday Aira Villegas kag Hergie Bacyadan, hurdlers Lauren Hoffman kag John Cabang Tolentino, swimmers Kayla Sanchez kag Jarrod Hatch, gymnast Aleah Finnegan kag fencer Samantha Catantan.
Nakasakay naman sa bangka nga napain sa Pilipinas sanday Chef de Mission Juanito Victor “Jonvic” Remulla kag pila ka sports officials Michael Angelo Vargas sang swimming, Marcus Manalo sang boxing, Cynthia Carrion Norton sang gymnastics, Patrick Gregorio sa rowing kag Agapito “Terry” Capistrano sa athletics.
Indi naman makaupod ang mga boksingero nga sanday Eumir Marcial, gymnast Carlos Yulo kag rower Joanie Delgaco naga-training ang mga ini sa ila tagsa ka hampang sa adlaw sang Sabado samtang si pole vaulter EJ Obiena ang nakatutok sa iya nga pre-game preparations sa Normandy.
Ang tatlo ka weightlfters nga sanday Vanessa Sarno, John Febuar Ceniza kag Erleen Ann Ando ang wala pa natapos sa ila nga training sa Metz kag nakatalana nga mag-abot sa Olympic Village sa Agosto 6.
Magakumpleto sa 22 ka atleta sang pungsod amo sanday gymnast gymnasts Emma Malabuyo kag Levi Ruivivar, golfers Bianca Pagdangan kag Dottie Ardina kag Judoka Kiyomi Watanabe.
Magasugod ang Opening ceremony ala-7:30 sang gab-i sa Paris ukon 1:30 sang kaagahon sa Pilipinas sa Sabado. Mangin maragtason ang nasambit nga Paris Olympics bangud indi ini pagahiwaton sa isa ka stadium kundi sa River Seine.
