ROXAS CITY – Nakabalhag na sang 8 ka mga suspected cases sang nagalapta nga Pertussis ang Provincial Health Office-Capiz.
Ini ang ginpahayag ni Dr. Ramon Alex Nolasco Provincial Health Officer II sang Capiz Health Office sang mainterview sang Bombo Radyo.
Suno kay Nolasco, base sa ila record sa nasambit nga numero 2 diri ang ginpaidalum pa sa test, 5 ang nadisregard bangud wala nalab-ot ang criteria kag 1 naman ang wala nagsunod sa criteria nga ginapatuman.
Mahibaluan nga ang pertussis ang nagalaton pinaagi sa respiratory droplets halin sa pag-ubo ukon pagpangatsi sang infected nga tawo.
May yara ini sang 3 ka stages, una amu ang early symptoms nga naka-eksperensya sang sintomas kasubong sang sip-on, lagnat kag pag-askad sang tutunlan sa sulod sang 1-2 ka semana; later symptoms – wala untat ukon ginabarukoy sang ubo; kag recovery stage – amu ang amat-amat nga paghagan sang pag-ubo.
Dugang pa sini nga makabulig agud malikawan ang balatian kun nabakunahan sang 3 ka primary immunization doses sang DTaP (diphtheria, tetanus kag acellular pertussis vaccine) ang lapsag naga-edad 3 tubtob 6 ka semana.
Bangud sini, hugot ang ila pagmonitor kag pagpakigbahin sa tanan nga mga local government unit agud hibaluon kung may yara sang mga kaso sa ila lugar.
Panugyan ni Nolasco sa mga ginikanan kinahanglan nga hibaluon ang mga criteria sang sakit agud mahibaluan kung anu ang dapat himuon, ipabilin man nga matinlo ang kaugalingon, tabunan ang baba kung mag-ubo kag magpanghatsing.
