ROXAS CITY – Ginkumpirmar ni Provincial Health Officer I Dr. Leah Del Rosario sang Capiz Provincial Health Office nga may yara na sang ika-siyam nga Person Under Investigation (PUI) sa probinsya sang Capiz.
Suno kay Dra. Del Rosario nga ang ika-siyam nga PUI amo ang isa ka lalaki, 67-anyos kag nagikan sa Marikina City kag nag-abot sa Capiz sang Marso 8.
Sang Marso 9, nagreklamo ini nga nabudlayan na magginhawa rason nga gin-abisohan nga magpa-admit na lamang sa ospital.
Ginpaidalom ini sa pila ka mga laboratory test kag diri nakita nga may yara ini sang bilateral pneumonia kag may problema sa iya nga korason rason nga hugot ini nga ginabantayan kag ginamonitor sang doctors kag nurses.
Samtang ginahulat sa karon ang resulta sang laboratory test nga ginpadala sa Research Institute for Tropical Medicine (RITM) sa Metro Manila.
Samtang ginpahayag ni Del Rosario nga nagapabilin nga Coronavirus Disease (COVID-19) free ang probinsya.
Sa gihapon nagapanugyan si Del Rosario nga indi magpanic ang publiko sa pagbakal sang alcohol sa pihak nga ipabilin nga healthy ang ikaayong lawas.
Matandaan nga sandig sa Executive Order No. 008 series of 2020 nga ginpapanaug sang gobernador nga suspendido ang klase sa tanan nga lebel sumugod Marso 13 kag ginadumilian ang anuman nga mass gathering.
Ginpanugyan man sa mga ginikanan nga siguraduhon nga yara lamang sa balay ang ila mga anak bilang kabahin sang preventive measures agud malikawan ang paglapta sang COVID-19.
Samtang sandig naman sa Executive Order No. 009 series of 2020 nga ginpapanaug sang gobernador nga nagamandu sang price freeze sa mga basic necessities, essential emergency medicine kag mga medical supplies matapos nga yara sa public health emergency ang pungsod.
