ROXAS CITY – May ginpatigayon nga serye sang aktibidad ang Provincial Health Office kadungan sang Provincial Dengue Day subong nga adlaw nga may tema ‘End Dengue: Starts with Me’.
Ini ang ginpahayag sang officer-in-charge sang PHO nga si Dr. Leah Del Rosario sang mainterview sang Bombo Radyo.
Katuyuan sang nasambit nga lihok amo ang mapasangkad pa ang kampanya kontra dengue sang ahensiya kag mapaandaman ang publiko sa halit nga dala sang balatian nga dengue sa tawo.
Nagsugod ini sa flag raising ceremony sa Capiz Provincial Capitol nga ginsundan sang pagpakita sang visual presentation may kahilabtanan sa balatian nga dengue.
May ginpatigayon man nga caravan kun sa diin tatlo ka grupo ang nagpadulong sa magkatuhay nga eskwelahan sa siyudad agud magpatigayon sang programa agud ma-edukar ang mga estudyante kag mga ginikanan angut sa nasambit nga balatian.
Ginpahayag ni Del Rosario nga agud matapna ang balatian nga dengue, kinahanglan matapna ang carrier sini nga amo ang lamok.
Bangud diri, hugot ang ila nga pagpahanumdom sa publiko angut sa pagpasangkad pa sang preventive measures bilang kontra sa paglapta sang balatian nga dengue sa mga komunidad kalakip na diri ang ‘4S’ strategy nga ginalakipan sang Search and Destroy Mosquito Breeding Places; Secure Self-Protection; Seek Early Consultation; Support Fogging o Spraying sa mga hotspot areas.
Mahibaluan nga sandig sa datos sang ahensiya naglab-ot na sa 1, 136 ang napagkit nga kaso sang nasambit nga balatian sa probinsiya subong nga tuig.
Mas mataas ini sang 700 porsyento kun ikomparar sa napagkit nga kaso sa kapareho nga period sang nakaligad nga tuig nga may yara lamang sang 140 ka mga kaso.
Napagkit ang pikamataas nga kaso sa siyudad sang Roxas nga may 234; banwa sang Dao nga may 132; 120 sa Panay; 118 sa Pontevedra; 74 sa President Roxas; 76 sa Ivisan; 55 sa Tapaz; 51 sa Dumalag; tig-44 sa Jamindan kag Panit-an; 40 sa Cuartero; 35 sa Sigma; 34 sa Mambusao; 29 sa Sapian; tig-20 sa Dumarao kag Pilar, kag 10 naman sa Maayon.
