ROXAS CITY – Nagaamat-amat na panglimpyo ang caretaker sang bulangan sa bahin sang Barangay Dayao, sini nga syudad para sa liwat nga pagbukas sang bulangan sa Capiz.
Sa interview sang Bombo Radyo sa caretaker nga si ‘Rodel’, ginpahayag sini nga nagahulat nalang ini sa mandu sang iya ‘boss’ kun san-o sila magabukas, apang posible subong nga bulan sang Marso, magasugod na ang ila operasyon.
Dako suno diri ang nangin epekto sang nag-untat ang operasyon sang bulang sang 2020.
Nagapati man ini nga madamo na sang mga bulangero nga nagakalangkag nga magasugod ang pagbulang.
Bentaha man suno kay ‘Rodel’ ang aktwal nga pagbulang, ikumparar sa online sabong bangud mas madamo ang mahimo madag-an, gani ginalauman nga magadagsa ang mga tawo sa liwat nga pagbukas sang bulang.
Nahibaluan nga sa idalom sang Alert Level 1, ginapahanugutan na ang pag-operate sang mga bulangan sa probinsya, kag sa syudad sang Roxas, legal ang mga bulangan sa Tanza kag Dayao.
