Temporaryo nga ginsirado ang pila ka gasolinahan sa pila ka mga rehiyon sa Luzon sa tunga sang malapnagon nga pagbaha.
Suno kay Department of Energy (DOE) Assistant Secretary Mario Marasigan, kinahanglan nila nga magsirado bangud sa amat-amat nga pagtaas sang tubig kag pamahog nga makalab-ot sa mga gasolinahan.
Nagikan sila sa National Capital Region, Cagayan Valley, Ilocos Region, Central Luzon, kag Calabarzon.
Sa pihak sini, suno sa iya, nagapabilin nga bastante kag malig-on ang supply sang krudo kag iban pa nga mga produkto sang petrolyo sa bug-os nga pungsod, samtang nagapadayon man ang operasyon sang dalagku nga gasolinahan sa mga lugar nga ginabahaan.
Apisar nga may mga problema sa pila ka mga dalanon, nagpadayon ang tayuyon nga pagdul-ong ukon transportasyon sang mga produktong petrolyo.
Nahanungod naman sa Liquified Petroleum Gas (LPG), nagpabilin man suno sa iya ang supply samtang ginabantayan sang DOE ang presyo sini, ilabi na sa mga lugar nga nagdeklarar sang state of calamity sa diin epektibo nga ginpatuman ang price freeze.
Sa kasubong nga mga lugar, ginadumilian ang pagsaka sang presyo sang mga produktong petrolyo samtang ginapahanugutan naman ang pagpatuman sang rollback.
