BOMBO ROXAS – Kahadlok kag kakulba ang nabatyagan karon sang pila ka mga Overseas Filipino Workers ukon OFW’s nga nagatrabaho sa Lebanon matapos ang mabaskog nga pagsigabong kag pagtay-og sa Beirut ang City Capital sang nasambit nga pungsod.
Ini ang ginpahayag ni Devin Indico masobra isa ka tuig na nagatrabaho bilang domestic helper kag tumandok sang Dumalag, Capiz sang mainterview sang Bombo Radyo Roxas.
Suno kay Indico nga takna alas 4 sang hapon samtang yara ini sa sulod sang balay sang iya amo hinali na lamang ini nga nakabati sang asud-asud nga pagsigabong nga ginsundan pa sang mabaskog nga pagtay-og kun sa diin madamo nga mga tawo ang nagasinggitan sa ila palibot.
Ginpahayag pa sini nga nakita niya ang pila ka mga edipisyo nga nagkalatiphag malapit sa ila lugar kag pagkasunog sang pila ka mga salakyan kag establisyemento kun sa diin madamo sang mga tawo ang pilason kag nagadinalagan.
Bangud diri, halos wala nakahibalo si Indico sang iya himuon gani nagpangamuyo na lamang ini samtang nagahilibion.
Nahibaluan nga naga-isahanon lamang ini bangud natabuan nga may yara sang ginkadtuan ang iya amo.
Tuman naman ang pagkabalaka ni Indico bangud may pila ka mga Pilipino man ang pilason sa natabo.
Ginkumpirmar man sini nga may isa ka pinay ang napatay bangud sa mabaskog nga pagsigabong.
Padayon naman ang pagpakig-angut sang Philippine Embassy sa Lebanon kun sa diin pila ka mga Pilipino ang nadalahig sa natabo.
Ginpahayag pa sini nga punuan naman ang mga ospital sa nasambit nga lugar kun sa diin pila ka mga biktima ang yara na lamang sa parking lot.
Sa karon nagapadayon sa gihapon ang pagpalong sang mga otoridad sa nagkalasunog nga mga edipisyo.
Ginaistoryahan naman sa nasambit nga pungsod ang isa ka eroplano nga ginapanag-iyahan sang Israel nga naghulog sang bomba sa bodega kun sa diin naghalin ang pagsigabong kag padayon pa nga ginahibalo sang mga otoridad sang Lebanon.
Sa karon, tuman na lamang ang pagpasalamat ni Indico nga wala sang may natabo nga malain sa iya matapos ang nagluntad nga pagsigabong.
