Ginabalay na sang lokal nga panguluhan ang pila ka mga plano para sa pagpa-ayo kag pagpa-uswag sang Pilar Mangrove and Beach Forest nga nahamtang sa Sitio Bat-os, Barangay San Ramon, Pilar Capiz.
Sa interview sang Bombo Radyo kay Mr. Valentino Piape, focal person sang Municipal Environment and Natural Resources Office (MENRO) Pilar, ginpahayag sini nga ang proyekto may tinutuyo nga magserbisyo bilang flood control agud maprotektahan ang mga pumuluyo sa tion sang kalamidad.
Suno kay Piape, samtang nagapadayon ang implementasyon, nangin isa na ini ka talan-awon, palahuwayan, kag kaladtuan nga ginapadulungan sang mga lokal kag turista agud magpahuway, maghaklo sang preska nga hangin, kag maglantaw sang manami nga view.
Pahayag pa niya, ginaplano man sang LGU nga himuon nga esplanade ang lugar, kag butangan sang mga estraktura nga pwede gamiton bilang venue sang nagkalain-lain nga okasyon kag community activities.
Dugang pa sini, ginapadayon man subong ang pagbutang sang mga signages bilang paandam sa mga motorista kag pahanumdom sa mga bisita para sa pagmentinar sang katinlo kag kaayuhan sang palibot. Ginahulat nalang nga matapos ang proyekto agud masugdan ang pag-implementar sang pila ka mga pagsulondan sa pagbisita sa lugar.
Ginapahibalo man ni Piape nga welcome ang tanan nga magbisita, apang hugot man ang panawagan sini sa tanan—tumandok man ukon bisita—nga mangin responsable sa basura paagi sa kampanya nga “Bring Home Your Trash”, agud maprotektahan ang dunang manggad sang Pilar.
Sa karon, wala pa sang klaro nga dugang nga plano para sa lugar, apang padayon ang pagtan-aw sang MENRO sa mga posibilidad nga makadugang pa sa kaayuhan kag ka-attract sang beach forest sa banwa sang Pilar.
