ROXAS CITY – Personal nga nagpadulong sa opisina ni Pilar Mayor Arnaldo Perez, ang pila ka mga pumuluyo sang ila banwa agud magpangayo sang nagakaigo nga bulig.
Sa interview sang Bombo Radyo kay Mayor Perez, ginpahayag sini nga sumugod gin-igo sang Paralytic Shellfish Poisoning (PSP) ukon red tide ang ila banwa, gilayon sila nga nagpanghatag sang bulig sa mga apektado nga mangingisda kag nagapanginhas partikular ang yara sa mga coastal barangays.
Suno sa alkalde, pila sa ila mga ginpahatag amu ang mga food packs, mga kinahanglanon sa sulod sang balay kag mga sarang magamit agud makapapiyan-piyan sa ila mga galastuhon.
Sa pihak sini, aminado man si Perez nga indi ini bastante sa iya mga pumuluyo bangud tubtob subong positibo sa gihapon sa red tide ang bug-os nga probinsya.
Apisar nga ginadumilian ang pagpanguha, pagbaligya kag pagkaon sang anu man nga sahi sang mga panginhason, may yara sa gihapon suno diri nga mga pumuluyo ang nagatilaw nga indi ini pagsundon.
Isa man sa rason nga ginalantaw sang alkalde, bangud sa kapigaduhon nga ginaka-eksperyensyahan sang tagsa-tagsa.
Apang, hugot sa gihapon kag liwat nga ginapahanumdum ni Mayor Perez sa mga Pilareño nga sundon kag indi na pagsuwayon ang ginapatuman sang gobyerno agud indi na madugangan pa kag maglala ang ila sitwasyon.
