-- ADVERTISEMENT --

Ginkabig nga dako nga bulig sa mga tricycle driver ang liwat nga pagnubo sang presyo sang gasolina sang tatlo tubtob apat ka pesos kada litro sa masunod nga semana, apang ginpahayag nga indi ini ang permanente nga solusyon sa nagapadayon nga problema sang sektor sang transportasyon.


Sa interview sang Bombo Radyo kay Ian De Pedro, isa ka tricycle driver nga may yara na sang kapin 20 tubtob 25 ka tuig nga eksperyensya sa pagbiyahe, iya ginpahayag nga dako ang ila kalipay sa asud-asud nga rollback sang presyo sang gasolina bangud makabulig ini sa ila adlaw-adlaw nga palangabuhian.


Suno kay De Pedro, apisar nga makahatag sang gamay nga pagmag-an sa ila kita ang pagnubo sang presyo sang gasolina, indi gihapon nila makontrol ang presyo sang produktong petrolyo bangud yara ini sa kamot sang dalagko nga oil companies.

Pahayag pa niya, isa sa mga mayor nga problema sang sektor sang transportasyon amo ang Oil Deregulation Law, gani ginapanawagan niya nga ini ang dapat na nga ibusura agud makabalik ang gahum sang gobyerno sa pagkontrol sang presyo sang langis.