ROXAS CITY – Luyag na karon sang pila ka mga Overseas Filipino Workers (OFWs) sa Iraq nga nagatrabaho sa isa ka ospital sa pungsod antes pa man maglala ang nagapadayon nga kinagamo sa Middle East.
Ini ang ginpahayag sang wala na ginhingadlan nga migrant worker sa nasambit nga pungsod sang mainterview sang Bombo Radyo Roxas.
Suno diri nagahulat na lamang siya sang direktiba sang embahada sang Pilipinas sa nasambit nga pungsod para sa proseso nga dapat nila nga sundon para sa ila pagbiya sa lugar.
Aminado man ini nga tuman siya nga nahadlok kasunod sang pagpalupad sang Iran sang masobra isa ka dosena nga missiles sa duha ka mga Iraqi bases nga ginateniran sang US troops.
Apang may mga Pinoy man suno sa iya nga luyag nga magpabilin sa lugar bangud nagapanindugan sila nga malayo sa katalagman ang ila ginatrabahuan sa ginaluntaran sang kinagamo sa Iraq.
