ROXAS CITY – Ginpanindugan ni Pilar Mayor Arnold Perez nga wala sini ginapabay-an ang naguba nga foot bridge sa Barangay Dulangan, Pilar, Capiz.
Suno kay Perez nga gilayon sini nga ginbisitahan ang lugar matapos nga naguba ang tulay sang pagpanalasa sang bagyo Ursula.
Gilayon ini nga nagpaubra sang temporaryo nga tulay nga human sa kawayan apang ini ang na-anod bangud sang mataas kag mabaskog nga current sang tubig sa suba.
Matapos nga naguba ang temporaryo nga tulay liwat naman ini nga nagpa-ubra sang panibag-o nga tulay nga human gihapon sa kawayan apang ini ang ginpataas agud indi na malab-ot sang tubig kag ini ang natapos sang tinalikdan nga semana.
Ginklaro man ni Perez nga wala makasulod sa 20% development fund sang Annual Investment Program sang Pilar ang pagpakaayo sang tulay bangud sang October 2019 pa natapos ang ila nga AIP.
Bangud diri, ginpasalig ni Perez nga tinguhaan sini nga makapangayo sang pondo gikan sa mga nasyonal nga ahensya sa pagpakaayo sang hanging bridge agud mangin matalunsay ang pagtabok sang mga manunudlo kag mga estudyante padulong sa Dulangan National High School.
Apang kun wala sang may makahatag sang pondo plano sini nga magpa-realign sang pondo gikan sa 20% development fund agud masuguran ang pagpaubra sang hanging bridge sa nasambit nga lugar.
