ROXAS CITY – Preparado na ang Pilar PNP para sa kapistahan ni San Juan De Bautista sa Lunes nga adlaw, Hunyo 24, 2024.
Sa interview sang Bombo Radyo kay PMAJ Alfred De Leon, Hepe sang Pilar Municipal Police Station, ginpahayag sini nga nakapreparar na ang ila deployment plan kag naka-full alert status na ang pwersa sang kapulisan sa pag-monitor sang kalinong kag katawhay sang amo nga banwa.
Dugang pa sini, may ginbutang naman ang Philippine Coast Guard sang mga net sa baybayon nga magaserbe tanda sang mga pumuluyo nga dira lang kutob makapaligo agud makalikaw sa posible matabo nga insidente kaangay sang pagkalumos.
Suno pa kay PMAJ De Leon nga magabutang sila sang police assistance desk sa kada beach resort kag kaupod na diri ang katapo sang PCG kag MDRRMO.
Magalibot man ang mobile patrol agud mapasiguro ang seguridad sang mga pumuluyo. Mahibaluan nga ang banwa sang Pilar ang madamo sang baybayon bangud isa ini ka coastal municipality kag magluwas sini may mga kabusayan man sa nasambit nga banwa.
Ginapanugyan man ni De Leon sa mga pumuluyo nga bantayan ang mga kabataan sa pagpaligo kag magkooperar sa mga otoridad agud mangin malinong kag matawhay ang pagsaulog sang San Juan Festival.
