ROXAS CITY – Nag-abot na sa Roxas City Airport ang pilgrim relics ni St. Therese of the Child Jesus, para sa tatlo ka adlaw sini nga pagbisita sa pili nga parokya sa arkidiyoses sang Capiz.
Sakay ini sa eroplano sang Philippine Air Force, nga naghugpa sa nasambit nga pahugpaan, pasado alas-9 subong nga aga sang Lunes.
Nagikan sa Diocese sang Tagbilaran, sa Saint Augustine Parish sa Panglao, Bohol ang amu nga relics sang Santo.
Humalin sa airport, magadiretso ang pilgrim relics sa Camp Macario Peralta sa banwa sang Jamindan, para sa patigayunon nga Santos nga misa, kun sa diin, ang St. Therese of the Child Jesus ang ginapahayag Patroness sang militar.
Masunod nga magabisita ang pilgrim relics sa St. Catherine of Alexandria Parish sa Mambusao, pagahiwaton man ang Santos nga misa, veneration kag vigil alas-7 tubtob alas-9 sa gab-i.
Pebrero 21, buwas nga adlaw sang Martes, magabiyahe ini padulong sa parokya sa banwa sang President Roxas, magahiwat sang Santos nga misa alas-9 sang aga kag pagasundan man sang public veneration, kag pagkahapon, igadul-ong ini sa Immaculate Conception Metropolitan Cathedral diri sa syudad sang Roxas, kun sa diin pagahiwaton ang Santos nga misa alas-5:30 sang hapon nga pagasundan sang public veneration kag prusisyon nagikan sa Cathedral padulong sa Carmelite Monastery sa Brgy. Lawaan, sini nga syudad.
Pebrero 22, Miyerkules (badlis), igahapit ang pilgrim relics ni St. Therese of the Child Jesus, sa Mission Station sang Brgy. Bilao, sa banwa sang Sapian, kag magahiwat sang balaan nga misa alas-9:45 sa aga, antes ang pagdul-ong sa arkidiyoses sang Kalibo, sa probinsya sang Aklan.
Nahibaluan nga ini na ang ikatatlo nga pagbisita sang pilgrim relics sang Santos sa probinsya sang Capiz, matapos nga nauntat ini sang kasagsagan sang pandemya, nga ginsug-alaw sang mga katapo sang kapulisan, suldado kag kaparian.
