SINGAPORE-Nagkasugot ang Pilipinas kag Singapore nga magbinuligay sa pagtuon sang posibilidad nga magamit ang nuclear energy bilang dugang nga pagkukunan sang kuryente, agud mapabakod ang seguridad sang suplay sang enerhiya sang duha ka pungsod.
Ginlagdaan sang duha ka pungsod ang mga Letter of Intent sa Singapore International Energy Week agud mapauswag ang kooperasyon sa malinong nga paggamit sang nuclear energy kag sa posibilidad sang pagkonektar sang ila mga sistema sang kuryente.
Sa idalom sang kasugtanan, magbayloay ang duha ka pungsod sang impormasyon kag maayo nga mga pamaagi sa paggamit sang abanse nga teknolohiya, paghanas sang mga eksperto, pagdumala sang nuclear waste kag paghimo sang mga patakaran para sa kaluwasan kag legal nga responsibilidad. Magbinuligay man sila sa pagpanaliksik agud mapauswag ang ila kahibalo kag kapasidad sa sini nga teknolohiya.
Ginpahayag ni Energy Secretary Sharon Garin nga padayon pa nga ginatun-an sang gobyerno sang Pilipinas kon mas maayo nga rehabilitahon ang Bataan Nuclear Power Plant ukon magpatindog sang bag-o nga pasilidad. Kinahanglan pa nga usisaon sing maid-id ang teknolohiya, kaluwasan, gasto kag kalawigon sang paggamit sang pasilidad antes maghimo sang pinal nga desisyon.
Ginalantaw man sang gobyerno ang posibilidad sang pagbinuligay sa mga pribado nga kompanya kag iban pa nga potensyal nga partner agud mapondohan ang proyekto. Apang, wala pa sang pinal nga desisyon parte sa lokasyon, pamaagi sang pagpondo ukon iskedyul sang pagtukod sang nuclear power plant.
Sa pihak naman sang Singapore, ginakabig man ang nuclear energy nga isa sa mga posible nga sabat sa nagadugang nga panginahanglan sa kuryente. Apang, padayon pa nila nga ginatun-an ang kahandaan sang pungsod, lakip na ang kaluwasan sa paggamit sang nuclear technology kag husto nga pagdumala sang radioactive waste, antes magdesisyon kon gamiton nila ini sa paghimo sang kuryente.
Ang inisyatibo kabahin sang mas malapad nga panikasog sang duha ka pungsod sa pagpalig-on sang seguridad sang enerhiya sa Southeast Asia. Sa karon, ang kasugtanan nagapatuhoy anay sa pagtuon, pagbinuligay kag pagpalambo sang kapasidad, kag wala pa nagakahulugan nga aprubado na ang pagtukod sang nuclear power plant sa Pilipinas.
