Ginreport sang Bureau of Quarantine sang Department of Health nga wala pa sang bag-o nga kaso sang Nipah virus nga na-detect sa Pilipinas tubtob subong.
Matandaan nga ang pinakaulihi nga kaso sang Nipah virus ang na-record sa Sultan Kudarat sadtong 2014.
Apang suno sa BOQ officer-in-charge nga si Dr. Roberto Salvado, wala sila sang may na-monitor ukon na-intercept nga nag-abot sa pungsod nga natapikan sang virus gikan sa direkta nga flight halin sa India, sa diin may na-record nga seasonal outbreak sang amo nga balatian.
Apang ginpasalig sang bureau sa publiko nga may ginapatuman nga safety health measures, lakip na ang maid-id nga monitoring sang bureau sa mga travelers nga naga-abot sa mga airports kag seaports 24/7 agud malikawan ang pagsulod kag paglapta sang virus sa pungsod.
Magluwas diri, may yara man suno sa iya sang e-Travel system nga ginagamit sa border control, health surveillance kag economic analysis. Paagi sa sini nga application, ang mga pasahero gikan sa direkta nga mga flight halin sa India mahapos nga mabantayan.
May yara man sang infrared thermal scanners nga naka-deploy sa mga airports kag seaports kun sa diin duha ka BOQ nurses ang gin-assign sa pag-monitor sang temperatura sang mga naga-abot nga pasahero kag may mga spotters man nga maga-check sang rashes ukon iban pa nga senyales ukon sintomas sang balatian, nga wala ginadeklarar sa e-travel app.
Nagpaandam man ang opisyal sang BOQ sa publiko ilabi na kun nagabiyahe sa mga pungsod nga may history of virus outbreaks.
