ROXAS CITY – Eksklusibo nga ginsaysay sang isa ka Capizeña Overseas Filipino Worker (OFW) ang iya nangin eksperyensiya sang makasalbar ini sa massive explosion sa Beirut City, Lebanon.
Sa interview sang Bombo Radyo kay Stephany Balbares Pando, tumandok sang Barangay Balaring, Ivisan, Capiz nga naga-trabaho bilang domestic helper sa nasambit nga pungsod, ginpahayag sini nga kasubong nga nangin ‘ghost town’ ang bilog nga siyudad sang Beirut kasunod sang nasambit nga pagsigabong.
Suno diri nga naga-exercise siya sang makabati sang mga pagsigabong rason nga gilayon man ini nga nagtuyo nga magdalagan paguwa sang balay sang iya amo.
Apang wala ini makasalbar sa pagkaguba sang balay bangud nakaangkon siya sang mga samad sa butkon, tiil, ulo kag iban pa nga parte sang lawas.
Ginpahayag sini nga kasubong nga yara siya sa isa ka damgo sang makit-an ang sitwasyon sang iban pa nga tawo nga napilasan nga yara lamang sa kilid sang karsada ginabulong sang mga rescuers.
Ginpahayag sini nga mabudlay man ang pag-akomodar sang mga ospital sa linibo ka mga nagkalapilasan.
Bangud sa panic, wala naman na-obserbar pa sang mga tawo ang pila ka health protocols sa ginapangatubang karon nga pandemiya tuga sang COVID-19 kapareho sang physical distancing kag pagsuksok sang face masks.
