ROXAS CITY – Madinalag-on nga natapos sang ginbansagan nga “Pinoy Aquaman” ang paglangoy sini sa pulo ka kilometros nga kalayuon halin sa island barangay sang Olotayan padulong sa People’s Park sang Barangay Baybay, Roxas City.
Sa interview sang Bombo Radyo Roxas kay Prosecutor Ingemar Macarine, ginpasalamatan sini ang mainit nga pagbaton sa iya ni Roxas City Mayor Ronnie Dadivas kag sang pila ka mga public official sa Capiz agud suportahan ang iya sini adbokasiya nga protektahan ang kadagatan kag amligan ang ikaayong lawas pinaagi sa endurance swim .
Natapos ni Macarine ang iya nga paglangoy sa sulod sang official record nga tatlo ka oras, kinse minutos kag singkwenta segundos nga mas madasig kun ikumparar sa ulihi sini nga endurance swim sa Masbate kun sa diin naglab-ot ini sang masobra apat ka oras.
Liwat naman nga nakabalhag sang kasaysayan si Pinoy Aquaman matapos kilalahon nga labing una nga indibidwal sa Roxas City kag probinsya sang Capiz nga naglangoy halin sa Olotayan Island padulong sa Baybay, Roxas City sa distansya nga 10.8 kilometers nga tayuyon kag unassisted.
