Ginpabilib sang Filipino singer nga si Matty Juniosa ang mga hurado kag tumalan-aw sang bantog nga British talent show pagkatapos sang iya standing ovation audition.
Ang 27-anyos nga singer ang nagkanta sang kanta ni Prince nga “Purple Rain”, nga nagresulta sa standing ovation sang mga tumalan-aw kag Golden Buzzer sang celebrity judge nga si Simon Cowell.
Bangud sini, direkta siya nga makasulod sa live shows sang kompetisyon.
Talalupangdon nga sang 2019, nag-intraa man si Matty sa isa ka talent kun sa diin nakalab-ot siya sa Top 12.
Nakibot man si Simon Cowell sa reaksyon sang mga tumalan-aw, kag nagsiling nga isa ini sa pinakadaku nga reaksyon nga ila nabaton sa palagwaon.
Samtang, gindayaw man siya sang iban pa gid nga mga kaupod nga judge nga sanday Amanda Holden kag KSI, nga nagdayaw sa iya tingog, presensya sa entablado, kag subong man sa iya makalilipay nga personalidad.
Sa subong, si Matty ang nagapuyo sa Glasgow, United Kingdom, sa diin nagatrabaho ini bilang isa ka part-time nga sserver samtang ginatinguhaan ang iya handom sa musika.
