Naghuyang ang peso sa P57.45 kumpara sa dolyar, ang pinakamahuyang nga lebel sini humalin sang Marso 26, 2025 suno sa Bankers Association of the Philippines (BAP).
Posible suno sa mga ekonomista nga magapabilin nga mahuyang ang piso bangud sa tensyon sa Middle East kag Europe, kaangay sang nagapadayon nga inaway sa tunga sang Israel kag Iran.
Bisan pa nga wala ini ginalauman nga may daku nga epekto sa inflation, mahimo ini makaapekto sa kita sang mga eksporter kag sa sektor sang manufacturing.
Sa pihak nga bahin, ang Purchasing Managers Index (PMI) sang pungsod nagnubo man sa 50.1 sang Mayo, gikan sa 53 sang Abril, nga nagapakita sang paghinay sang performance sang mga pabrika sa pungsod.
Nagpaandam man ang mga ekonomista nga posible magbaha ang produkto sang China sa Pilipinas bangud sa bag-o nga taripa nga ginpatuman sang U.S., nga mahimo makahalit sa lokal nga produksyon kag trabaho.
Apang, ang pagnubo sang balor sang piso ang makabulig man sa mga local exporters kag mamumugon.
Samtang, nagapati naman ang pila ka mga ekonomista nga temporaryo lamang ang pagluya sang piso kag ginalauman nga magabaskog liwat sa pagdagsa sang remittances gikan sa overseas Filipino workers subong nga school year kag sa palaabuton nga holiday season.
