Ginpasalamatan sang PISTON Capiz ang gintanyag sang gobyerno nga P5,000 nga fuel subsidy para sa mga drivers kag operators sa pampubliko nga transportasyon.
Sa interview sang Bombo Radyo kay Joebert Carandang, chairman sang PISTON-Capiz, iya ginpahayag nga apisar nga indi bastante ang 5k pesos nga fuel subsidy nga igatahag sa ila dako sa gihapon ang ila pagpasalamat bangud makabulig ini sa mga drivers kag operators.
Suno kay Carandang, ang 5,000 pesos nga fuel subsidy nga ihatag sa mga drivers kag operators, makapahagan-hagan na sa pang-adlaw-adlaw nga gastosan.
Dugang pa niya, kon magapadayon ang pagsaka sang presyo sang langis, posible man nga magapatigayon sang protesta ang ila grupo bilang pahayag sang ila panawagan.
Pahayag pa niya, nga indi lang dapat ang mga transport sector ang hatagan sang ayuda kundi pati man ang mga mangunguma bangud apektado man sila sang padayon nga pagasaka sang gatong.
Magluwas sina, nagapanawagan man ang transport group sang P5 nga dugang nga pamasahe kag temporaryo nga pagpanubo ukon pag-untat sang 12 percent VAT kag excise tax sa fuel products agud makaginhawa ang mga drivers sa tunga sang krisis.
Nahibaluan nga ginmando ni President Ferdinand Marcos, Jr ang gilayon nga pagpanagtag sang PHP 5,000 nga fuel subsidy nga magasugod sa masunod nga semana para sa mga drivers kag operators nga apektado sang pagtaas sang presyo sang gasolina bangud sa nagapadayon nga tensyon kag giyera sa Middle East.
Gin-engganyo man sini ang mga drivers kag operators nga may problema sa ila fuel subsidy card nga mahimo magkadto sa Land Bank of the Philippines kag ipa-validate ang ila nga card agud makabenepisyo sa subsidy program nga igahatag sang gobyerno.
