Padayon ang panawagan sang transport group nga Piston-Capiz Chapter sa pagpamatok sa Public Transport Modernization Program.
Suno kay Piston-Capiz Chairman Mr. Joebert Carandang, apisar wala mag-upod ang ila grupo sa transport strike ukon untat-biyahe nga ginpatigayon sa pila ka lugar sa pungsod, ginasuportahan nila ang panawagan sang ila nga mga kaupdanan sa sektor sang transportasyon ilabi na ang pagpaiway sa modernization program sang gobyerno.
Nagapati si Carandang nga kinahanglan pagatun-an sang maayo sang gobyerno ang amu nga programa kag dapat nga ikonsulta sa sektor sang transportasyon.
Dugang pa sini nga panawagan man nila nga ibalik ang lima ka-tuig nga validity sang prangkisa sang ila nga mga yunit.
Suno pa kay Carandang, kun indi sila pagpamatian sang gobyerno ilabi na sang ahensya nga LTFRB, lauman nga magapadayon ang pagprotesta sang mga transport sector.
