ROXAS CITY – Magaupod ang Pinagkaisang Tsuper at Operator Nationwide (PISTON) Capiz sa pagapatigayunon nga pag-untat byahe sang mga transport group, operators kag drivers nga pagahiwaton sa Lunes tubtob Miyerkules Nobyembre 20-22.
Sa interview sang Bombo Radyo kay Mr. Joebert Carandang Presidente sang PISTON-Capiz, ginpahayag sini nga isa lamang ka adlaw ang ila gintalana para sa nasambit nga pagprotesta bangud indi nila luyag nga mabudlayan ang mga commuters.
Suno kay Carandang tinutuyo sini nga mapakigbato nila ang ila kinamatarong bilang mga operators kag drivers nga indi sila madulaan sang pangabuy-anan ilabi na ang mga indibidwal nga diri nagakuha sang inugbuhi sa ila tagsa ka mga pamilya.
Sa pagkamatuod suno diri nga luyag sang pila ka mga drivers kag operators nga himuon kun tani ang amu nga protesta sang duha ka adlaw apang ginsiling sini nga kun mahimo isa lang ka adlaw kay panigurado nga maapektuhan ang mga sumalakay.
Mahibaluan nga yara sa masobra 40,000 nga mga grupo sang PISTON, ang maga-upod sa amu nga protesta.
Ginklaro man ni Carandang nga sa kada banwa, isa ka adlaw nga wala sang byahe ang mga salakyan sa nasambit nga adlaw apang sa syudad sang Roxas mahimo na nga magbalik sa byahe ang mga drivers pag-abot alas 3:00 ukon alas 4:00 sang hapon.
Bangud sini, nagapangayo si Carandang sang pasaylo sa tanan nga mga sumalakay nga kun tani maintindihan sila bangud luyag lamang sang mga ini nga indi sila madulaan sang pangabuy-anan.
Matandaan nga ginkasa sang grupo nga PISTON ang tatlo ka adlaw nga untat byahe bilang pagprotesta angut sa indi pagrenew sang mga prangkisa sumugod sa Disyembre 31, kung sa diin hugot ini nga ginpamatukan sang kadam-an.
