ROXAS CITY – Pagahinalaan pa sang Pinagkaisang Samahan ng mga Tsuper at Operator Nationwide (PISTON) kun maga-upod sila sa isa ka semana nga untat-biyahe sang pila ka mga transport group agud ipabutyag ang ila pagpamatuk sa Public Utility Vehicle (PUV) Modernization Program sang gobyerno.
Sa interview sang Bombo Radyo kay Mr. Joebert Carandang, presidente sang Hugpong Transport Piston-Capiz, ginsiling sini nga pagatalakayon pa subong nga adlaw kun maga-upod ang bug-os nga isla sang Panay sa panawagan sang mga operators nga ipa-iway ang nasambit nga programa.
Suno kay Carandang, pinaagi sa untat-biyahe, mabatyagan kuntani sang Land Transportation Franchising and Regulatory Board (LTFRB) ang sitwasyon sang mga driver sang tradisyunal nga jeepney kun i-phased out ini madula sila sang pangabuy-anan.
Ginklaro ni Carandang, nga wala nila ginapamatukan ang modernization kundi ang pagsulundan kag proseso sang amu nga programa kun sa diin hawid na sang kooperatiba ang prankisa sang isa ka operator kun magconsolidate ini sa modernization.
Bangud sini, may posibilidad nga malubog sa utang ang mga operators bangud obligado na ini nga maghatag sang P30,000 – P35,000 sa kooperatiba kada bulan sa sulod sang 7 katuig.
Mahibaluan nga ang isa ka modernized jeep ang nagabalor sa kapin P2.8-M.
Ginpunto man ni Carandang, nga sa baylo suportahan sang gobyerno ang locally manufactured jeep kag makabulig sa mga Pilipino mas ginapaboran pa nila ang pagkuha sang modernized jeep ukon bus sa iban nga pungsod.
Kun dulaon naman ang tradisyonal nga jeepney, madula naman ang imahe kag kultura sang jeep nga ginapabugal sang Pilipinas.
