Padayon ang pag-arangkada sang Detroit Pistons matapos sini gintambakan sang 20 points ang No. 2 team sa Eastern Conference nga Boston Celtics.
Bangud sini, ini na ang ika-walo nga magkasunod nga kadalag-an sang Pistons isa ka panibag-o nga achievement nga wala pa nahimo sang hubon sumugod sadtong 2008.
Nahimo sang Pistons nga tapuson ang 6-game winning streak sang defending champion gamit ang halos 53% nga overall shooting percentage.
Ginkuha ini nga tion sang hubon ang wala paghampang ni 2024 NBA Finals MVP Jalen Brown agud makapasulod sang kabug-usan nga 47 shots samtang ginabantayan ang rebounding kag nagkamda sang kabug-usan nga 51 rebounds.
Mahibaluan nga ang 33 shots lamang ang nasabat sang Boston kag wala sini nahimo nga matupungan ang depensa sang Detroit.
Sa kabug-usan nga hampang, nagkamda ang Pistons sang 13 steals kag ginpilit ang defending champion kung sa diin naghimo sang 17 turnover.
Bangud sini sa 3-point area lamang nag-abanse ang Boston kung sa diin napasulod ang 21 3-pointers kontra sa 13 nga pagbalos sang Pistons.
Apang indi nangin bastante ang 3-point line agud mabulsa kuntani ang 2024 champion.
Liwat nga ginpangunahan sang bagito nga guard nga si Cade Cunningham ang iya hubon kag nagbulsa sang 21 points kag 11 assists samtang 26 points naman ang na-amot sang bench nga si Malik Beasley.
Sa Boston, si Jayson Tatum lamang ang naghimo sang 20-point performance kung sa diin may kabug-usan nga 27points, ka 6 rebounds.
