Yara sa 752 na ang request nga nabaton sang Land Transportation Franchising and Regulatory Board (LTFRB) para sa special permit bangud sa ginalauman nga pagdamo sang mga pasahero sa tion sang undas.
Tuyo sang special permit nga ma-accommodate ang kadamuon sang pasahero sa tanan nga terminal sa Kalakhang Maynila partikular humalin Oktubre 25 tubtob Nobyembre 10.
Kaangut sini, magahiwat sang inspeksiyon ang mga tinawo sang Land Transportation Office agud masiguro nga maayos ang mga pasilidad kag masiguro ang roadworthiness sang mga pampubliko nga salakyan nga maga-biyahe.
Maga-deploy naman sang dugang nga tinawo ang Special Action and Intelligence Committee for Transportation agud maipatuman ang batas trapiko bangud sa damo sang mga pasahero kag salakyan sa mga terminal.
Ang Metropolitan Manila Development Authority (MMDA) naman ang padayon nga magamando sa daloy sang mga salakyan ilabi na sa peak travel period.
Samtang, ginalauman na man nga pagadugangan ang presensiya sang mga pulis nga magabantay sa mga matao nga lugar kasubong sang terminal agud mapabilin ang kaayuhan kag kalinong.
Ginganyat naman sang pamunuan sang PITX ang mga pasahero nga magpadulong sang timprano kag i-check ang ila mga schedule sang biyahe.
