May pila ka mga opsyon nga ginhatag ang chief sang Environmental Enforcement Division sang Environment Management Bureau ukon EMB-DENR Regional Office 6 para masolusyunan ang problema sa basura sang banwa sang Panay.
Ginpahayag ni Forester Vicente Los Bañes nga mahimo magpahamtang sang containment area para diri maula ang mga residual waste sang banwa, magbakal sang makinarya ukon kagamitan nga maga-proseso sang biodegradable waste ukon magrequest kag makig-negosyar sa Roxas City government nga pahanugutan sila nga sa sanitary landfill sang syudad sa Barangay San Jose makaula sang ila basura.
Apang suportado sang opisyal ang ginasiling plano sang LGU-Panay nga magbakal na lamang sang makinarya nga gamiton sa pagproseso sang mga basura bangud indi nila marekomendar ang pagtukod sang sanitary landfill sa nasambit nga banwa ba-se sa geographical location sang lugar.
Sa probinsiya sang Capiz ang Roxas City pa lamang ang may yara sang sanitary landfill kag ang banwa sang Tapaz nga ongoing sa karon ang konstruksyon.
Suno kay Forester Los Bañes nga naghatag sang P1.231 million ang ahensiya sa gobyerno probinsiyal, bilang suporta sa programa sang Contreras administration nga pagtukod sang Plastic Recovery Facility.
Apang may counterpart man ang provincial government sa nasambit nga proyekto nga katuyuan ma-proseso ang mga plastic waste.
Nagpahanumdum si Los Bañes sa mga opisyales sang banwa sang Panay nga aksyunan na ang problema sa basura bangud kun mapaslawan sila, mapwersa ang ahensiya nga magpasaka sang kaso sa alkalde, SB members kag MENRO officer sang Panay.
Samtang liwat ginpanindugan sang opisyal ang pagdumili sa pag-operate sang open dump site sa diin may mandu na si DENR Secretary Roy Cimatu nga saraduhan ang tanan nga disposal facility kag mahimo pa nga mabilanggo bangud sa paglapas sa RA 9003 Section 37 ukon ang pag-operate sang open dump site.
