ROXAS CITY – Nagpatigayon na sang limited face to face classes ang President Manuel Roxas Memorial School – North, nga nagsugod subong nga fourth quarter sang S.Y. 2021-2022.
Ini ang ginkumpirmar ni Mrs. Mary Ann Martinez, Principal III sang PMRMS-North, sang mainterview sang Bombo Radyo.
Suno diri, sa 1017 nga populasyon sang ila estudyante, 99 palang diri ang mga kabataan nga nagapartisipar kag ini tanan ang mga fully vaccinated.
Dugang man ni Martinez, nga hugot nila nga ginasunod ang pagsulondan sa pagpatigayon sang limited face to face classes, kaangay sang pagsuksok sang face mask kag pagsunod sa social distancing.
Ginpahayag nga mahimo gid makapartisipar ang mga kabataan apisar indi pa fully vaccinated basta may yara lang sang consent sa ginikanan.
Pahayag pa sang Principal nga isa sa mga rason nga gamay palang sa karon ang ginpahanugutan sang ila ginikanan nga mag sulod pinaagi sa in-person classes, posible bangud nagapangduha-duha pa ang mga ini sa seguridad sa ikaayong-lawas sang ila kabataan.
Apang, nagapati si Martinez nga madugangan pa ang magapartisipar sa face to face classes kag ginpasalig sini nga ginahimo nila ang tanan agud maprotektahan ang ila mga estudyante.
