Ginakabig sang Philippine National Police nga malinong kag madinalag-on ang Traslacion ni Poong Jesus Nazareno subong nga tuig.
Suno kay National Capital Region Police Office Chief Maj. Gen. Anthony Aberin, positibo niya nga ginpaambit ang iya ‘initial assessment’ sa selebrasyon.
Suno sa iya, ‘generally peaceful’ ang kabilugan nga pagsaulog sang kapiestahan ni Jesus Nazareno 2026.
Gani, sa katapusan sang kahiwatan, iya ginkilala kag ginpanginbulahan ang mga kapulisan sa madinalag-on nga pagtuman sang ila papel sa traslacion.
Sa pihak sang mga pagpanghangkat kag kabudlayan nga gin-atubang sa malawig nga prosesyon, nalipay ini nga nabalik na sa simbahan sang Quiapo ang imahe sang Poon.
Kaangot sini, gin-ako sang nasambit nga opisyal nga nabudlayan ang mga katapo sang kapulisan, partikular sa pagguyod sang andas.
Ginsiling sini nga naipit ini sang naglabay kag nag-agi sa ruta sa Arlegui Street bangud nagasadsad ang andas sa duta.
Positibo man sini nga ginpaambit nga wala sang seryoso nga krimen ukon major crime incident nga nagluntad samtang masako ang tanan sa pagsaulog sang festival.
Sa kasaysayan sang prosisyon, ini nga tuig makabig nga pinakamalawig nga Traslacion.
Sugod sang nagsugod ini kahapon, Enero 9 sa Quirino Grandstand, alas 4:00 sang aga, naglawig ini sang 30 ka oras kag 50 minutos agud makalab-ot sa Simbahan.
