Ginmando ni Philippine National Police (PNP) Acting Chief PLtGen. Jose Melencio Nartatez Jr ang mas hugot nga imbestigasyon angut sa shooting incident nga nagluntad sa Sibulan, Negros Oriental nga gintunaan sang kamatayon sang apat ka mga indibidwal lakip na ang tatlo ka pulis.
Suno kay Nartatez, ang imbestigasyon nga ginpatigayon sang Police Regional Office Negros Island Region (PRO-NIR) dapat lamang nga masabat ang tanan nga anggulo sa insidente kag ginhatagan pagtamod nga dapat wala sang pagpanago ukon pagtabon sa madalum nga imbestigasyon sang mga imbestigador sa insidente.
Ginpahanumdom man sang hepe ang mga kumander nga ipatuman ang mas hugot nga surveillance sa ila mga tinawo agud mapabilin ang disiplina sa ila hanay.
Ginpahayag man sini nga dapat man sila magpatigayon sang nagakaigo nga monitoring sa ila mga subordinates kag gilayon nga maghulag kon may maobserbahan nga nagahimo sang violation ukon indi maayo nga pagginawi sa ila mga tinawo.
Madumduman nga sang nagligad lang nga Biyernes sang gab-i natabo ang shooting incident sa isa ka ilimnan sa Sibulan nga involved ang isa ka pulis nga nagluthang sa isa ka babaye kag tatlo ka mga pulis.
