May mga adjustment pa ang PNP sa palaabuton nga festival sang Black Nazarene sa syudad sang Manila.
Suno kay Manila Police District (MPD) chief Police Brigadier General Arnold Thomas Ibay, may nakita sila nga posible pagbag-o nga pagahimuon sa walkthrough sang Black Nazarene parade route.
Ginahimo nila ang nasambit nga walkthrough agud masiguro nga mangin safe ang mga alagyan sang prusisyon.
Ang pila sa mga nakita sini amo ang mga pagtukod sang dalan sa kilid sang Fraternal Street nga magatuga sang katalagman sa mga deboto ilabi na kag sila wala sing sapatos.
Tun-an nila sang maayo ang nasambit nga mga kakulangan nga ila nakit-an.
Madumduman nga pila ka milyon ka mga deboto ang nagapakigbahin kada tuig sa festival of the Black Nazarene nga ginahiwat kada Enero 9.
