ROXAS CITY -Yara sa full alert status ang Philippine National Police kasunod sa pag-obserbar sang All Saints kag All Soul’s Day.
Ginpahayag ni Police Executive Master Sergeant Donna Asmod, tagpamaba sang Capiz Police Provincial Office (CPPO) kabahin sang security operation sang pulisya ang pagpahamtang sang Police Assistance Hub sa mga sementeryo agud may sarang pangayuan sang bulig ang mga pumuluyo.
Kanselado man ang tanan nga mga leaves of absence sang mga PNP personnel kag obligado sila nga magreport sa ila areas of responsibility.
Nahibaluan nga kabahin sang operational plan sang PNP ang Oplan Ligtas Undas 2019 nga may katuyuan nga mapatuman ang pagsulundan agud masiguro ang seguridad sang magapadulong sa mga sementeryo.
Magluwas sa mga sementeryo may deployment man sang mga pulis sa terminal, pahugpaan, port, simbahan kag mga lugar sa diin makit-an ang madamo nga tawo.
Magabulig man sa PNP sa pagpabilin sang kalinong kag katawhay ang mga force multipliers kag traffic enforcers nga magasiguro sa dalagan sang trapiko.
Nagpahanumdum man ang pulisya sa mga pumuluyo nga magapadulong sa mga sementeryo nga likawan ang paggamit sang knapsack kag indi magdala sang hinganiban, ilimnon agud indi makaperwisyo sa iban.
