PANITAN, CAPIZ – Ginakabig ni Police Captain Merry Chris Dela Cruz nga dako nga pagpanghangkat ang iya pagbalik liwat bilang officer-in-charge Chief of Police sa Panitan Municipal Police Station sa Panitan, Capiz.
Sa interview sang Bombo Radyo kay Captain Dela Cruz, iya ginpahayag nga duha ang iya role subong bangud magapabilin siya sa gihapon nga Public Information Officer sang Capiz Police Provincial Office.
Suno sa iya, prayoridad sang iya pagpamuno sa Panitan Municipal Police Station amo ang barangay drug clearing operations bangud may yara pa sang duha ka mga barangay nga indi pa drug cleared sa nasambit nga banwa.
Pahayag niya, padayon man ang mga kampanya kontra illegal drugs kag loose firearms.
Panawagan ni Captain Dela Cruz sa mga pumuluyo sang Panitan nga padayon lang nga mag-cooperate sa mga kapulisan agud mapabilin ang kalinong kag katawhay sang banwa.
