Pormal na nga nagpungko si Police Lieutenant Colonel Francisco Paguia bilang bag-o nga Force Commander sang 1st Capiz Provincial Mobile Force Company ukon 1st Capiz PMFC.
Gintal-usan sini si Police Major Alfred V. De Leon nga magasaylo bilang Assistant Force Commander kag Platoon Leader sang 2nd Maneuver Platoon.
Sa interview sang Bombo Radyo kay Paguia, iya ginpahayag nga pagatutokan sini ang mga programa sa mga land barangays kag sa livelihood program para sa mga residente.
Suno kay Paguia, isa man sa ginatutukan sini amo ang Project RTT 3389 sa diin 128 na ka mga barangays sa probinsya ang nakaturn-over na sa illegal armas bilang kabahin sang kampanya para sa mas malinong nga komunidad.
Ginpahayag sini nga iya ipatuman ang consultative leadership style, ukon estilo sang leadership nga nagapamati kag nagapangayo sang opinyon, ideya sang mga personnel antes maghimo sang desisyon.
Nahibaluan nga sakop sang 1st Capiz PMFC ang Roxas City kag ang mga banwa sang Panay, Pontevedra, Panitan, Maayon, President Roxas kag Pilar.
