ROXAS CITY – Natalupangdan na nga daan sang police sa lugar ang 20-anyos nga gunman nga nagtuyo nga mag-assassinate kay anay Presidente Donald Trump antes pa man nag-umpisa ang campaign event sang Republican presidential nominee sa estado sang Pennsylvania.
Sa interview sang Bombo Radyo Roxas kay Bombo Rufino “Pinoy” Gonzales, international correspondent sa United States of America, ginpahayag sini nga magluwas sa police natalupangdan man sang pila ka mga tawo nga makaduluda ang hulag sang nasambit nga suspek apang ginbalewala sang mga otoridad.
Suno kay Gonzales nga sang nakit-an sang police ang suspek sa ibabaw sang atop sang Building nga iya ginplastaran agud tiruhon si Trump, ginpaandaman sini gilayon ang secret service kag ginpangita sang police ang amo nga persona apang sang nakit-an ini nagpanaya sang armas ang suspek.
Nagpanago ang police kag masunod na nga natabo amo ang nabatian nga lupok sa diin natabo ang pagpangluthang kay Trump.
Ginkilala ang gunman nga si Thomas Matthew Crooks, 20-anyos nga residente sang Bethel Park sa amo man nga estado nga sang ulihi napatay man sa kamot sang Secret Service agents.
Mahibaluan nga isa ang patay kag duha ang napilasan sa amo nga pagpangluthang kun sa diin naigo si Trump sa dulunggan.
Sa karon, nagapadayon ang imbestigasyon sang mga otoridad kun ano ang motibo ni Crooks sa pagpangluthang. Samtang, ginpahayag sang FBI nga nagakooperar ang pamilya ni Crooks sa imbestigasyon.
