Nagalab-ot na gid lamang sa 24 milyones pesos ang nabilin sa 40 milyones pesos nga ginpain nga pondo para sa Roxas Memorial Provincial Hospital (RMPH) sang anay Del Rosario administration.
Suno kay Board Member Jonathan “Sonny” Besa nga 16 milyones pesos na ang nagastos diri sang Contreras administration kun sa diin ang 8 milyones pesos diri ang gingamit sa rehabilitation sang dialysis center kag ang 8 milyones pesos ang gingamit sa pagpaubra sang facade ukon pagpatahom sang atubang nga porsyon sang nasambit nga ospital.
Ginpahayag ni Besa nga kuntani ginbakal na lamang sang generator set ang gingamit sa pagpatahum sa ospital.
Suno sa iya nga kun may bag-o lamang nga generator set ang amo nga ospital posible nga nalikawan ang pagkapatay sang apat ka mga pasyente sa sulod sang Intensive Care Unit (ICU) sadtong nakaligad nga Disyembre 25, 2019.
Suno kay Besa nga ang nasambit nga 40 milyones pesos ang para kuntani sa improvement sang 3-storey building sang RMPH kag igabakal sang dugang nga mga equipments agud maka-akomodar sang dugang nga mga pasyente.
Sa karon ginatugyan na lamang sang provincial-board ang pagpatigayon sang imbestigasyon sa Ombudsman agud matumod ang rason sang pagkapatay sang apat ka mga pasyente nga yara sa ICU sang nasambit nga ospital.
