Ginkumpirma sang presiding officer sang Sangguniang Panlalawigan ang pag-released na sang ila pondo para sa operasyon sang ila talatapan sa 3rd quarter.
Apang ginpahayag ni Vice Governor Jaime ‘’Mitang’’ Magbanua nga indi tanan nga board members ang nakabaton na sang ila pondo.
Kalakip sa wala nakabaton amo sanday Board Member Matteo Hachuela, Jonathan Sonny Besa, PCL President Mitch Patricio kag iban pa.
Suno kay Magbanua natigayon lamang sini mahibaluan nga ma-release na ang ila pondo sang nagpadala sang mensahe si Atty. Atlas Catalan sa isa ka staff sang mga board members kag ginapakuha sa iya talatapan ang Allotment Released Order (ARO).
Aminado man ang opisyal nga bilang amay sang sangguniang panlalawigan luyag sini makuha ang sabat kag explinasyon ni Governor Esteban Evan Contreras II angut sa indi paghatag sang pondo sang tanan nga mga board members.
Ginatan-aw man ni Magbanua sa positibo nga perspektibo ang mangin resulta sang ginpadala nga sulat sa gobernador.
Samtang ginatan-aw sang bise gobernador sa positive perspective ang patigayunon nga committee hearing sa Lunes may kaagtanan sa P79-million nga supplemental budget nga ginahinyo sang Office of the Governor.
Gin-athag sang opisyal nga tanan nga sulat nga mabaton ang gina-transmit sa natungdan nga komite sa Sangguniang Panlalawigan agud matun-an kag talakayon.
Ginpanindugan ni Magbanua nga isa na ka seasoned board member si Jonathan Sonny Besa kag nahibaluan sini ang iya resposibilidad nga dapat tun-an kag talakayon sang nagakaangay ang tanan nga isyu.
Ginakabig man sini si Besa nga asset sang probinsiya bangud isa ini sa mga board members nga dedikado, pinaka-effective kag nagatrabaho sang maayo.
