Pondo sang talatapan ginapaigo-igo para mahatagan sang proyekto ang tanan nga kabaranggayan sa premier distrito sang Capiz –Cong. Billones

Gin-athag sang kongresista sa premier distrito sa probinsiya sang Capiz nga ginapa-igo igo sini ang pondo sa 219 ka mga barangay sa kabanwahanan nga sakup sang 1^st district para tanan ang mahatagan sang proyekto.

Ginhimo ini nga pahayag ni Capiz 1^st district Congressman Emmanuel Billones Sr., bilang sabat sa palamangkutanon sang pila ka mga barangay kapitan nga nagasunggod bangud indi nila mapat-ud kun may tsansa pa nga mahatagan sang proyekto ang ila barangay.

Suno sa kongresista nga handum sini nga mahatagan ang nasakupan nga barangay sa 1^st district sang ila ginahinyo nga priority projects, apang bangud P90 million lamang ang pondo sang talatapan sini nga 2021, ginapa-igo igo lamang niya ini sa pito ka banwa sa premier distrito sang Capiz.

Apang sa pagpungko sini bilang kongresista sa premier distrito sang Capiz, masobra sa katunga sang nasakupan nga banwa kag barangay ang nahatagan sang proyekto kasubong sang barangay hall, covered gym, irrigasyon, farm to market road kag iban pa.

Naghinyo man sang paghangup si Congressman Billones sa iban nga mga barangay nga wala pa makabaton sang proyekto nga maghulat hulat lamang bangud nagapangita man ini sang pamaagi para mahatagan niya ini sang ila ginapangayo nga proyekto.

Samtang ginpalab-ot sang opisyal sa natungdan nga mga barangay kapitan nga madamo sang ginapangayuan nga proyekto nga magpakig-angut sa alkalde sang ila banwa agud wala sang duplication sa proyekto nga matabo.

Ginpalab-ot man sang kongresista sa mga punong barangay nga nakasumiter na sang ila request kag resolution sa talatapan nga mahimo nila matsekyar ang status sang ila mga proyekto bangud bukas man ang opisina sini sa Roxas City hall.