PONTEVEDRA, CAPIZ – May yara na sang person of interest ang katapo sang Pontevedra Municipal Police Station sa insidente sang pagpanglabo nga nagluntad sang Sabado de Gloria Abril 19, 2025 sa Brgy. Ilaya, Pontevedra, Capiz.
Matandaan nga ginkilala ang mga biktima nga sanday alyas “Bert”, yara sa legal nga pang-edaron nga residente sang nasambit nga lugar, kag si alyas “Tomy”, 52-anyos nga residente naman sang Brgy. Sublangon, sa amo nga banwa.
Sa interview sang Bombo Radyo kay PMAJ Gregg Anthony Salbang, Hepe sang Pontevedra PNP, ginpahayag sini nga tatlo ka mga persona ang may kahimuan sa pagpanglabo sa mga biktima.
Dugang pa sini nga sandig sa ila nga ginpatigayon nga imbestigasyon, ginapahayag nga kilala man sang mga biktima ang ginatudlo nga mga suspek.
Madumduman nga natabo ang pagpanglabo sa isa ka bilasyunan sa nasambit nga lugar nga nagresulta sa pagkapilas sang nasambit man nga mga biktima nga sa karon yara na sa istable nga kondisyon apang nagapabilin sa gihapon sa ospital.
Suno pa kay PMAJ Salbang nga lunsay yara sa impluwensya sang makahulubog nga ilimnon ang magtimbang nga bahin sang natabo ang amo nga insidente.
Sa karon, ginapreparar na sang kapulisan ang mga dokumento kag ginahulat nalang ang desisyon sang mga biktima sa pagpasaka sang kaso batuk sa mga suspek.
