Opisyal nga ginbaton ni Pope Leo XIV ang “Ring of the Fisherman” ukon Piscatory Ring, nga nagasimbolo sang awtoridad sang Santo Papa bilang tal-us ni San Pedro.
Ang seremonya ginhiwat kasunod sang Misa sang Inagurasyon sang Domingo, Mayo 18, sa St. Peter’s Square.
Ang singsing ginhatag sa iya ni Cardinal Luis Antonio Tagle, Pro-Prefect sang Dicastery for Evangelization.
Ang pagbaton sang singsing isa sa mga nagapanguna nga bahin sang pag-umpisa sang isa ka bag-o nga Santo Papa, kag ginakabig nga makasaysayan nga palatandaan sang iya responsibilidad sa pagpanguna sa Simbahan Katoliko.
Ang Piscatory Ring, nga nagsugod pa sang ika-13 nga siglo, isa ka simbolo sang awtoridad kag responsibilidad sang Santo Papa bilang tal-us ni San Pedro, ang Apostol nga Mangingisda.
Gingamit ini anay bilang singsing sa pagselyo sang opisyal nga mga dokumento tubtob sang 1842, apang ginagamit lamang ini subong sa seremonyal nga paagi.
Ang matag Santo Papa may yara sang kaugalingon nga talagsaon nga singsing. Kon mapatay ang Santo Papa, ginaguba ang singsing agod indi na ini magamit liwat.
Ang singsing ni Pope Leo XIV nagapakita kay San Pedro nga may mga yabi kag pukot, bilang simbolo sang pagpadayon sang misyon nga ginbilin ni Kristo kay Pedro.
Paagi sa pagbaton sang singsing, opisyal nga gin-ako ni Pope Leo XIV ang espirituhanon nga responsibilidad bilang ika-266 nga Manugbulos kay San Pedro.
