Roxas City – Kadungan sang National Women’s Month sa subong nga bulan, nagpanugyan sanday Myleen Dogelio Population Program Officer I kag Mary Grace F. Somil Population Program Officer II sang PHO Capiz sang pila ka mga tikang kun paano protektahan ang mga kababainhan sa nagkalain-lain nga mga sitwasyon ilabi na pag-abot sa pagplano sang pamilya, kag iban pa nga mga problema nga ginapangatubang.
Sa interview sang Bombo Radyo kay Dogelio kag Somil, ila ginpahayag nga ang pagtudlo sa mga kabataan angut sa sexual education ilabi na sa mga estudyante nga masami biktima sang teenage pregnancy ukon temprano nga pagbusong sa diin mahimo makadala sa ila sa delikado nga sitwasyon ang ila ginahatagan sang pagtamud kaupod ang pila ka mga ahensya nga may tinutuyo nga mapanubo ang kaso sang teenage pregnancy sa Capiz.
Sa pagkamatuod suno diri, ba-se sa ila datos sumugod 2018 kag 2021 nagnubo na ang kaso sang temprano nga pagbusong apang sadtong 2022 tubtob subong nga tuig liwat naman nga nagtaas ini.
Isa sa ila mga ginalantaw nga rason amu ang pagka-addict sa gadgets sang mga kabataan nga nangin giya agud sudl-on ukon testingan ang isa ka butang apisar nga yara pa lamang ang mga ini sa lamharon nga edad, kakulangan sa ihibalo angut sa sex education.
Bangud sini, nagpatigayon ang ila talatapan kaupod ang Department of Education, mga LGU’s, kag iban pa nga ahensya nga magdihon sang isa ka aktibidad nga magatudlo sa mga kabataan sang mga dapat kag indi dapat himuon sa tion nga yara na ang mga ini sa edad nga sila mahimo na nga magbusong.
Angut sini, kinahanglan man suno diri nga magplano sa pagsugod sang pamilya agud matatap kag mahatagan sang maayo nga bwas damlag ang mga kabataan kag malikawan nga mag-antos ang mga ini.
Panugyan sini sa mga kababainhan nga hatagan sang tion nga atipanon ang kaugalingon kag mangin responsable sa pamilya nga gintukod.
